Sinabi ni Paniqui Mayor Miguel "Dor"  C. Rivilla na halos dalawang beses isang taon nila isinasagawa ang pagkakaloob ng trabaho sa mga Paniquenyo, bilang isa sa mga pangunahing serbisyong hatid ng pamahalaang bayan.

Ang pang-pito na serye ng Jobs Fair na ito ay inaasahang makakapagbigay ng trabaho sa daan-daang Paniquenyo matapos na tumugon sa paanyaya ang maraming kumpanya at mga pribadong korporasyon sa Tarlac, Clark Field - Pampanga at Maynila.

Sa kanyang pang Lunes na Radio Program - Lipad Nang Umunlad sa Himpilang dzTC, sinabi ni Rivilla na sa kasalukuyan, isang malaking kumpanya na lisensiyadong taga-pangalap ng mga skilled workers ang kanilang inanyayahan upang tumanggap ng mga aplikante.

"Umaabot sa mahigit 2,000 skilled workers ang kinakailangan sa Bansang Guam. Subalit ang mga nakakapasang aplikante ay sasanayin muna sa US Standards bago dalhin sa Guam," pahayag ni Rivilla.

Sinabi pa ng alkalde na isang magandang pagkakataon para sa mga skilled workers na Paniquenyo ang isasagawang pagsasanay na ito dahil magaganit nila ito bilang kakaibang kaalaman hindi lamang sa pang-lokal na trabaho kungdi ito ay magagamit din nila sa pagtratrabaho sa ibang bansa na may mataas na standards. (Ulat ni JoyfSgOnzales)